BIZKAIKO MEDIKUEN ELKARGOA

ANNA FERRER - VICENTE FERRER FUNDAZIOA

Bizkaiko Medikuen Elkargoak, 2012ko ekainaren 19an, Bizkaiko Medikuen Elkargoaren Osasunarekiko Konpromisoaren 1. Saria eman zuen Elkargoaren egoitzan, eta ekitaldira berrogeita hamar bat lagun bertaratu ziren: elkargokideak, agintariak eta herritarrak. Lehen edizio horretan, saria Anna Ferrerrek jaso zuen, haren senar Vicente Ferrerrekin batera Vicente Ferrer Fundazioa sortzeagatik; Fundazio hori garapenerako gobernuz kanpoko erakunde bat da.

Saria jaso zuen, hain zuzen, Vicente Ferrerren heriotzaren hirugarren urteurrenean. Vicente Ferrer Anantapurren hil zen, 1969tik emaztearekin batera lanean aritu zen Indiako barrutian.

Fundazioak osasun landa-sare bat sortu du: 6 ospitale eta 17 landa-klinika jarri ditu, eta osasun-arloko hainbat profesional Indiako kolektibo behartsu eta baztertuenetako 2,5 milioi lagunen osasuna zaintzen ari dira; kolektibo horiek dira dalit edo ukiezinena eta tribu eta kasta marjinatuenetako biztanleena, hain zuzen.

Elkargoko presidentea, Cosme Naveda doktorea, Anantapurrera joan zen 2010ean, eta GGKEak Indiako barruti hartan berrogei urte baino gehiagoko lanaren ondoren sortu duten osasun-sarea ezagutu zuen.
Behartsuenei laguntzeko eta osasun-arreta bermatzeko Fundazioaren konpromisoa eta ahalegina ikusita, Bizkaiko Medikuen Elkargoak erabaki zuen lehen edizioko saria Anna Ferrerri ematea, behartsuenek osasun-arreta medio bizimodu duinagoa izan dezaten hark hartutako konpromisoa aintzateste aldera.

Ekitaldian, Anna Ferrerrek berak jaso zuen Bizkaiko Medikuen Elkargoaren Osasunarekiko Konpromisoaren 1. Saria eta poz handia hartu zuen. Euskal Autonomia Erkidegoan jasotako lehenbiziko saria zuen eta, beraz, are bereziagoa izan zen. Hitzaldian azaldu zuen Anantapurren nola lan egiten duten eta zer erronka dauzkaten.