BIZKAIKO MEDIKUEN ELKARGOA

Bizkaiko Medikuen Elkargoa 1917an sortu zen, helburu nagusi honekin: Bizkaiko mediku profesionalei laguntzea eta haiekin elkarlanean aritzea jardunbide profesionalean, lana ondo egin dezaten, pazienteen mesedetan.

Ordutik hona, erakundea garaietara moldatzen joan da, konpromiso hau izan duelarik hasiera-hasieratik gaurdaino: erakunde demokratiko eta botere politiko, erlijioso eta ekonomikoekiko erakunde independente bakarra izatea, mediku GUZTIAK biltzen dituena eta, gainera, legeria arruntetik haratago doan jokabide-kode batek gobernatzen duena.

Bizkaiko Medikuen Elkargoaren xedea izan behar du eta da, besteak beste, gizarteari bermatzea elkargoko medikuek lana ondo egiten dutela eta etika eta ezaupide egokiak dituztela. Medikuek egin behar dutena da sendatzea, prebenitzea, heztea... Eta hori egin behar dute beti errespetatu behar dituzten arau jakin batzuk betez: gizarteak ezarritako arauak (legeria arrunta) eta beren buruei ezarritako arauak (Medikuntzako Kode Deontologikoa).

Elkargoak profesionaltasun medikoaren kontzeptua defenditzen du, eta kontzeptua honela ulertzen du: printzipio etiko eta deontologiko, balio eta jokabideen multzoa, medikuntzako profesionalek hiritarrei ematen dieten zerbitzuarekiko duten konpromisoaren oinarria.

Printzipio eta balio horiek gizarte-aldaketekin batera bilakatu egiten dira eta gizarteak medikuengan duen konfiantza bermatzen dute. Alegia, konpromisoa da lehiakideekiko, zintzotasunarekiko, etikarekiko, jardunaren etengabeko hobekuntzarekiko, altruismoarekiko eta osasuna bezalako lehentasunezko ondasun sozialarekiko.

Horrela izan da orain arte eta horrela segituko du izaten aurrerantzean; izan ere, Bizkaiko Medikuen Elkargoaren apustuak dira medikuen profesionaltasunaren kontzeptua lantzen eta zaintzen jarraitzea, erronka berriei aurre egitea, zerbitzu berriak diseinatzea, gizartera gehiago irekitzea eta, horretarako, osasunaren inguruko gai orokorrei buruzko heziketa- eta informazio-ekimenak martxan jartzea eta beste agente batzuekin elkartasun berriak sortzea.

Horri guztiari esker, Bizkaiko Medikuen Elkargoak erreferente izaten jarraituko du, eta gero eta erreferente garrantzitsuagoa izango da, gainera, erakunde modernoa delako, interes-taldeen premiak kontuan hartzen dituelako eta, oro har, gizartetik hurbil dagoelako.